Toshkent, shiddatli 1990-yillar. Fara laqabli yosh jinoiy avtoritet dunyo choʻqqisida edi. Biroq kutilmaganda hammasi ostin-ustun boʻlib ketadi – Fara balandlikdan yiqilib, komaga tushadi. Oradan yigirma yil oʻtib, u shifoxona palatasida koʻzini ochadi va yangi voqelikni tanimaydi. Karavot yonida uning esida qolgan yosh xotini emas, yuzida yillar izi qolgan horgʻin ayol oʻtiribdi. Uyda esa uni shiringina qizaloqdan qattiqqoʻl tuman prokuroriga aylangan qizi kutmoqda. Faqat goʻdakligini koʻrgan oʻgʻli esa Fara mutlaqo tushunmaydigan tilda gapiradigan tiktoker boʻlib yetishgan. Endi 90-yillarning boʻronli qahramoni ushbu gʻalati yangi dunyoni tushunishi kerak.
