Alan Arkin

Alan Arkin (inglizcha Alan Arkin, to'liq ismi – Alan Uolf Arkin) – mashhur amerika aktyori, teatr rejissyori va yozuvchi, kino sohasidagi ish uchun "Oskar", "Oltin globus" va "BAFTA" kabi nufuzli mukofotlar bilan taqdirlangan. 1934-yil 26-martda Nyu-Yorkning Bruklin tumanida, ortodoks yahudiylar oilasida tug'ilgan. Yoshligida Alan Arkin musiqiy ijrochi bo'lishni xohlagan va "The Tarriers" nomli havaskor guruhda o'ynagan. Keyinchalik u "Second City" nomli teatr komediya truppasi yaratishda ishtirok etgan. 1957-yilda "Calypso Heat Wave" filmi ekranga chiqqan, unda Alan Arkin o'zining birinchi kino rolini ijro etgan, ammo titrda uning ismi ko'rsatilmagan. 1963-yilda u Brodveyda debyut qilgan. Teatr sahnasidagi muvaffaqiyat aktyorni Gollivudga olib keldi. Birinchi muhim ishi 1966-yilda "The Russians Are Coming, the Russians Are Coming" ("Ruslar kelmoqda! Ruslar kelmoqda!") filmidagi roli bo'ldi. Ushbu komediyadagi leytenant Rozanov roli uchun Alan Arkin "Oskar" mukofotiga nomzod qilingan va "Oltin globus" mukofotini "eng yaxshi aktyor" nominatsiyasida olgan. Shuningdek, 1966-yilda Arkin ishtirokidagi yana bir film chiqqan: bu "The Last Mohican" ("Oxirgi mogikan") qisqa metrajli filmi edi. Keyingi yilda aktyor yana ikkita filmda o'ynagan – "Woman Times Seven" ("Yetti marta ayol") va "Wait until dark" ("Qorong'i tushguncha kuting"). 1968-yilda Alan Arkin "The Heart Is a Lonely Hunter" ("Yurak yolg'iz ovchi") filmida rol ijro etgan. Jon Singer roli uchun u "KCFCC Award" va "NYFCC Award" mukofotlarini olgan, shuningdek, "Oskar" va yana bir bor "Oltin globus"ga nomzod qilingan. Biroq, Amerika Kino Akademiyasi mukofotini Alan Arkin faqat 2006-yilda olgan. Shu paytgacha u 40 dan ortiq filmda suratga tushgan, ulardan ba'zilari: "Catch-22" ("Ulovka 22", 1970-yil), "Hearts of the West" ("Garbning yuraklari", 1975), "Edward Scissorhands" ("Edvard qo'llari pichoq", 1990), "Gattaca" ("Gatakka", 1997) va boshqalar. 2006-yilda "Little Miss Sunshine" ("Kichik miss Baxt") komediya dramasida ikkinchi darajali rol uchun Alan Arkin "Oskar" statuetkasini olgan. Shundan keyin aktyor yana bir qator kinolentalarda suratga tushgan.