Berjess 1907-yil 16-noyabrda Ogayo shtati Klivlend shahrida (AQSh) tug'ilgan. Ikkinchi Jahon urushi paytida Meredith Amerika havo kuchlarida xizmat qilgan va kapitan unvoni olgan.
Aktyorlik karerasini Berjess 1933-yilda Nyu-Yorkdagi Eva Le Gallien teatr kompaniyasiga qo'shilish orqali boshlagan. Garchi Meredith keng jahon auditoriyasi oldida asosan kino va televideniyedagi ishi bilan tanilgan bo'lsa-da, u teatr aktyori va rejissyori sifatida ham katta ta'sir ko'rsatgan.
Berjess Meredithning Brodveydagi debyuti "Romeo va Juletta" spektaklida bo'lgan va u haqiqiy yulduzga 1935-yilda Maksvell Andersonning "Qishning hukmronligi" (Winterset) asaridagi rolidan keyin aylangan. Keyingi yilda u ushbu pyesaning Alfred Santella rejissyori ostidagi ekranlashtirilgan versiyasida o'z rolini takrorlagan.
Aktyor katta e'tiborni 1939-yilda "Sichqonlar va odamlar" (Of Mice and Men) filmidagi Jorj roli va 1945-yilda "Oddiy askar Jo haqidagi hikoya" (Story of G.I. Joe) filmidagi harbiy muxbir Erni Payl roli bilan jalb etgan.
1940-yillarda aktyor ko'plab filmlarda suratga tushgan, ulardan "Ikkinchi xor" (1940), "Gornichnaya kundaligi" (1946) va "Bizning to'y yo'limiz" (1948) filmlari bor.
Berjess Meredith Otto Premingerning sevimli aktyori bo'lgan va uning "Maslahat va rozilik" (1962), "Xarm usuli" (1965), "Yugur!" (1968) va "Shunday yaxshi do'stlar" (1971) filmlarida suratga tushgan.
Aktyor "Qorong'u zona" (The Twilight Zone) serialida to'rtta turli rolni ijro etgan. Meredithni "O'n birinchi soat" (Eleventh Hour), "Sinish nuqtasi" (Breaking Point), "77 Sanset Strip" va "Betmen" seriallarida ko'rish mumkin.
1995-yilda Berjess Meredith o'zining oxirgi rolini "Keksalar g'azablanib ketdi" komediyasidagi Gustafson bobosi sifatida o'ynagan. Ikki yildan keyin, 1997-yil 9-sentyabrda, 90 yoshida aktyor vafot etgan.
